Tanzania:Abishe Dr Sengondo Mvungi bakatiwe igihano cy'urupfu bagiye kumanikwa

Tanzania:Abishe Dr Sengondo Mvungi bakatiwe igihano cy'urupfu bagiye kumanikwa

Urukiko Rukuru muri Tanzania rwakatiye abagabo batanu igihano cy’urupfu nyuma yo guhamywa icyaha cyo kwica umunyamategeko akaba n’umunyapolitiki wahataniye kuyobora Tanzania mu matora yo mu 2005, Dr Sengondo Mvungi.

Ku wa 18 Nzeri nibwo umucamanza muri uru rukiko rukuru Seif Kulita yafashe umwanzuro w’uko abagabo batanu aribo Msigwa Matonya, Mianda Mlewa, Paulo Mdonondo, Longishu Losindo na John Mayunga bicwa bamanitswe nyuma y’uko ibimenyetso byatanzwe n’ubushinjacyaha byemezaga koko ko aribo bishe Mvungi.

Bimwe mu byo urukiko rwagendeyeho rufata uyu mwanzuro harimo ubuhamya bw’abantu 16 biboneye aba bagabo amaso ku maso bakora iki gikorwa.

Dr Mvugi yitabye Imana ku wa 12 Ugushyingo 2013 aguye mu bitaro byo muri Afurika y’Epfo, aho yari yajyanywe kuvurirwa ibikomere yatewe n’amabandi yamusanze iwe mu rugo akamwiba mudasobwa ye na telefone.

Dr Mvugi yari umwe mu abanyapolitiki bakomeye muri Tanzania dore ko mu 2005 yahatanye mu matora yo kuyobora iki gihugu aho yaje ku mwanya wa gatandatu n’amajwi 55819. Aya matora yaje kwegukanwa na Jakaya Kikwete.