Tshisekedi uri ku gitutu yategetse abo bireba kugaragaza vuba abishe Ambasaderi w’Ubutaliyani

Tshisekedi uri ku gitutu yategetse abo bireba kugaragaza vuba abishe Ambasaderi w’Ubutaliyani
Perezida wa RDC, Félix Antoine Tshisekedi, yamaganye ubwicanyi bwakorewe Ambasaderi w’Ubutaliyani mu gihugu cye, Lucca Attanasio, ategeka inzego bireba gukora ibishoboka byose kugira ngo abari inyuma ya buriya bugizi bwa nabi bafatwe bashyikirizwe ubutabera.

Kuri uyu wa Mbere ni bwo Ambasaderi Attanasio, uwari umurinzi we ndetse n’umushoferi w’imodoka y’umushinga wa PAM bagendagamo biciwe ahitwa Kibumba hafi y’i Goma mu ntara y’Amajyaruguru.

Amakuru avuga ko bariya bantu uko ari batatu bishwe nyuma yo gushimutwa.

Leta ya Repububulika Iharanira Demokarasi ya Congo yashyize mu majwi inyeshyamba zo mu mutwe wa FDLR urwanya ubutegetsi bw’u Rwanda, izishinja kuba inyuma ya kiriya gitero.

Perezida Tshisekedi abinyujije kuri Twitter y’ibiro bye, yavuze ko "yashenguwe n’iyicwa rya Luca Attanasio, Ambasaderi w’Ubutaliyani muri RDC hamwe n’abandi bantu babiri barimo n’umukozi w’Ishami ry’Umuryango w’Abibumbye ryita ku biribwa, PAM."

Ubutumwa bwa Perezida Tshisekedi bukomeza buvuga ko yamaganye yivuye inyuma buriya bwicanyi bw’indengakamere, ategeka inzego bireba gutanga ibisobanuro kuri kiriya kibazo kugira ngo abakihishe inyuma bafatwe.

Buti: "Umukuru w’Igihugu yamaganye yivuye inyuma biriya bikorwa bibi byakorewe i Kibumba hafi ya Goma (muri Kivu y’Amajyaruguru ) anategeka inzego bireba gutanga ibisobanuro kuri iki kibazo kugira ngo abakoze icyaha bamenyekane kandi bashyikirizwe ubutabera."

Perezida Tshisekedi yavuze kandi ko mu izina rya Congo Kinshasa n’irye bwite, yihanganishije imiryango y’ababuze ababo, Perezida w’Ubutaliyani ndetse na PAM.

Guverinoma y’Ubutaliyani ku rundi ruhande yatangaje ko yababajwe cyane n’umutekano udahagije Guverinoma ya Congo yahaye Ambasaderi wayo wari wagiye muri kariya gace karangwamo umutekano muke.

Ubutaliyani bwavuze ko bufite uburenganzira bwo kurega imbere y’inzego mpuzamahanga Perezida Felix Tshisekedi wari ufite amasaha 24 yo gushimangira umutekano wa Ambasaderi yabwo mbere y’uko ariya makuba aba.

Iki gihugu cyasabye iperereza ryigenga kugira ngo hamenyekane abihishe inyuma y’urupfu rw’umudipolomate wacyo, kinasaba abaturage bacyo bari muri Kivu y’Amajyaruguru n’i Kinshasa kuhava byihuse.

like
0
dislike
0
love
0
funny
0
angry
0
sad
0
wow
0