U Burusiya: Barenze ku mabwiriza yo kuguma mu rugo bafatwa ku ngufu, bagiye kurega bacibwa amande

U Burusiya: Barenze ku mabwiriza yo kuguma mu rugo bafatwa ku ngufu, bagiye kurega bacibwa amande

Abangavu babiri bo mu Burusiya bagiye gutembera barenze ku mabwiriza yo kuguma mu ngo, bafatwa ku ngufu, bagiye kurega Polisi ibaca amande yo kurenga ku mabwiriza yo kwirinda ikwirakwira rya coronavirus.

Abo bakobwa bahohotewe ku wa 20 Mata 2020 ubwo batemberaga mu mihanda yo mu mujyi wa Krasnoyarsk mu Burusiya, muri iki gihe abantu basabwa kuguma mu ngo muri icyo gihugu. Gusa inkuru yaje kumenyekana ku wa 13 Gicurasi 2020 nk’uko The Sun yabitangaje.

Abakobwa babiri umwe w’imyaka 17 n’uwa 18 y’amavuko barahohotewe ndetse bamburwa telefoni n’imirimbo bari bambaye. Nyuma bajyanye ikirego kuri Polisi, ita muri yombi umugabo w’imyaka 55 y’amavuko ukekwaho kubahohotera kuko bamusanganye ibyo abo bakobwa bari bibwe.

Icyatangaje abantu ni uko nubwo bahohotewe, Polisi yanabaciye amande y’amayero 33 kubera ko barenze ku mabwiriza yo kuguma mu rugo, bagasohoka bagiye gutembera kandi hemewe serivisi z’ibanze gusa nko kujya kwa muganga, kuri farumasi cyangwa guhaha.

Umuvugizi w’uyu mujyi yatangaje ko baciwe amande nyuma yo gusanga basohotse mu ijoro kandi nta serivisi yo ngombwa bagiye gushaka. Icyakora ngo nyuma yo kubishyira mu itangazamakuru hibazwa ukuntu umuntu yajya kurega yahohotewe agacibwa amande, ayo mande yaje gukurwaho.

Kugeza kuri uyu wa 15 Gicurasi 202 u Burusiya ni ubwa Gatatu mu bihugu bifite abanduye coronavirus benshi kuko bagera ku bihumbi 262. Abapfuye barenga 2400 naho abakize ni ibihumbi 58. Iki gihugu cyakajije ingamba zo kwirinda ikwirakwira ry’icyo cyorezo gisaba abantu kuguma mu ngo.