U Bushinwa: Nta murwayi n’umwe wa Coronavirus ukirangwa muri Wuhan aho yaturutse

U Bushinwa: Nta murwayi n’umwe wa Coronavirus ukirangwa muri Wuhan aho yaturutse
Inzego z’ubuzima mu Bushinwa kuri uyu wa 26 Mata zatangaje ko nta murwayi wa Coronavirus ukirangwa mu mujyi wa Wuhan wafatwaga nk’isoko ya virusi ya Covid-19.

Mu gihe isi ibarura ubwandu bwa Coronavirus burenga 2,940,059 ndetse abasaga ibihumbi 200 bakaba bamaze guhitanwa n’iki cyorezo, umujyi wa Wuhan wibasiwe n’iyi virusi ku ikubitiro ndetse ukanafatwa nk’isoko yayo watangaje ko nta murwayi wa covid-19 ukiharangwa.

Mu kiganiro n’itangazamakuru, Umuvugizi wa Komisiyo y’Ubuzima mu Bushinwa, Mi Feng yashimiye abaganga n’inzego z’ubuzima z’iki gihugu ku bwitange zagize mu kurandura Coronavirus muri uyu mujyi. Yagize ati "Amakuru mashya kandi ashimishije ni uko kuri uyu wa 26 Mata 2020 nta murwayi wa covid-19 ukiri muri Wuhan. Turashima inzego z’ubuzima na buri wese watanze imbaraga ze mu kurandura iyi virusi."

Uyu mujyi wagaragayemo abarwayi basaga 46,452 bikubiraga 56% by’ubwandu bwose bwagaragaye mu gihugu, abapfuye barenga 3,869 bangana na 84% by’impfu zagaragaye mu gihugu hose.

Umurwayi wa nyuma muri Wuhan yarangije kuvurwa kuwa Gatanu ndetse kuwa Gatandatu nta bundi bwandu bushya bwagaragaye bituma nta muntu n’umwe usigara afite iyi virusi nk’uko ibiro ntaramakuru by’Ubushinwa Xinhua bibitangaza.

Iyi nkuru nziza ije nyuma y’aho Ishami ry’Umuryango w’Abibumbye rishinzwe ubuzima ku isi, OMS, ryari riherutse kuburira ibihugu byari byatangiye kuvuga ko uwakize iyi virusi aba afite ubudahangarwa butuma atakongera kuyirwara aho iri shami ryavuze ko nta gihamya cyemeza ko abakize badashobora kongera kwandura.

What's Your Reaction?

like
0
dislike
0
love
0
funny
0
angry
0
sad
0
wow
0