Uganda: Hahishuwe iyicarubozo rikomeye ryakorewe umusore ahatirwa kwemera ko ari Umunyarwanda

Uganda: Hahishuwe iyicarubozo rikomeye ryakorewe umusore ahatirwa kwemera ko ari Umunyarwanda

Umunyamakuru wa Televiziyo ya NBS, Samson Kasumba-Mulun yagaragaje uburyo umusore yakorewe iyicarubozo muri Uganda, agahatirwa kwemera ko ari Umunyarwanda bitaba ibyo akaborera muri gereza.

Ni imigenzereze imaze imyaka hafi itatu ikorwa n’inzego z’ubutasi n’iz’umutekano za Uganda ku bakekwaho kuba Abanyarwanda, aho batotezwa, bagafungirwa ahatazwi kandi ntibagezwe mu butabera, abadapfuye bagakurizamo uburwayi bukomeye.

Kuri uyu wa Mbere Samson Kasumba-Mulun yanditse kuri Twitter amagambo agaragaza umuntu wahuye n’iryo totezwa, akamanikwa amasaha 24 asabwa kwemera ko ari Umunyarwanda.

Nubwo nta zina yavuze ry’uwo musore, Mulun yavuze ko byabaye hagati ya tariki 4 n’iya 5 Gicurasi 2020. Ni amagambo yanditse ariko bisa n’aho yayabwirwaga m’umutangabuhamya.

Ati “Umuvandimwe wanjye yamanitswe ku byuma amasaha 24. Byabaye tariki 4 na tariki 5 Gicurasi. Nyuma y’amasaha 24 yikubise hasi, bamujyana ku zuba bakomeza kumuha amazi ashyushye, mu gihe abandi babaga bamukubita bamubwira ko azaborera muri gereza natemera ko ari Umunyarwanda.”

Ni ubutumwa bwakoze bamwe ku mutima, abandi mu banya-Uganda bakoresha Twitter bashaka kumugisha impaka, bavuga ko nta muntu ufungirwa ubusa muri Uganda.

Yahise asubiza ati "Uzigishe abandi batari njye. Ibyo nzi ndabizi. Iyo mba nshobora kwandika hano ibintu byose nzi."

Nubwo Mulun atasobanuye niba uwo musore yaraje kurekurwa, birerekana ko inzego z’umutekano za Uganda zigikomeje iyicarubozo n’itotezwa ku Banyarwanda nubwo mu ntangiriro z’uyu mwaka ibihugu byombi byiyemeje gukomeza gushyira mu bikorwa amasezerano yasinyiwe i Luanda umwaka ushize, arimo guhagarika itotezwa n’iyicarubozo, no gufungura abafashwe binyuranyije n’amategeko.

Ibyabaye kuri uwo musore ni nabyo biherutse kuba kandi kuri Elly Tumwine, washimuswe n’inzego z’umutekano muri icyo gihugu tariki 16 Gicurasi akajyanwa ahantu hatazwi gukorerwa iyicarubozo, nyuma urukiko rugategeka ko agezwa imbere y’urukiko ariko inzego zamufashe zikanga kubyubahiriza.

Kuri ubu hari amagana y’Abanyarwanda bafungiye muri Uganda mu mabohero atazwi cyangwa se izindi nzu zitazwi aho bakorerwa iyicarubozo. Inshuro nyinshi u Rwanda rwakunze gusaba Uganda guhagarika ibi bikorwa bibangamira abaturage barwo bari muri iki gihugu.

Mu minsi ishize, Minisitiri w’Ububanyi n’Amahanga wa Uganda, Sam Kutesa, yatangaje ko Uganda izashyikiriza u Rwanda abaturage barwo 132 bari bafungiye muri iki gihugu mu gihe abandi 310 bo bakurikiranywe n’inkiko.

Abakurikiranira hafi umubano wa Uganda n’u Rwanda banenze impamvu Kutesa yatanze zituma abo 310 bo badafungurwa, z’uko bakurikiranyweho ibyaha bibangamira umutekano w’igihugu birimo ubugambanyi, ubutasi n’ibindi.