Uganda: Ifungwa rya Bobi Wine ryatumye abantu barenga 20 bapfa yafunguwe

Uganda: Ifungwa rya Bobi Wine ryatumye abantu barenga 20 bapfa yafunguwe
Depite Robert Ssentamu Kyagulanyi uzwi nka Bobi Wine, yarekuwe atanze ingwate nyuma y’iminsi ibiri yari amaze afunzwe.

Bobi Wine yarekuwe atanze ingwate ya miliyoni imwe y’amashiringi ya Uganda, mu gihe abishingizi be barimo Depite John Baptist Nambeshe na Paul Mwiru buri umwe yatanze miliyoni eshanu.

Kuri uyu wa Gatanu ni bwo Bobi Wine yitabye urukiko rukuru rwa Iganga, mu gihe Uganda imaze iminsi yugarijwe n’umutekano muke watewe n’abigaragambirizaga ifungwa rye.

Yari amaze iminsi afungiye kuri Sitasiyo ya Nagalama, mu gace ka Jinja.

Mu rukiko Bobi Wine yagaragaye yambaye umupira w’ubururu, akaba yagaragaraga nk’umuntu udafite ikibazo.

Icyumba cy’urukiko cyari cyuzuye abarwanashyaka b’ishyaka NUP rya Depite Kyagulanyi, ibyatumye umucamanza ahitamo kubagabanya basigara ari 20.

Mu iburanisha abunganizi ba Bobi Wine, bari bayobowe na Lubega Segona, bashinje Polisi ya Uganda kumucira imyenda no kumwicira urubozo muri gereza.

Kyagulanyi yahise asomerwa ibyaha ashinjwa, byose arabihakana.

Leta ya Uganda yamuregaga ko muri iki cyumweru yakoze igikorwa gishobora gukwirakwiza icyorezo cya COVID-19.

Ku wa Gatatu w’iki cyumweru ni bwo Bobi Wine yari yatawe muri yombi, afatiwe mu gace ka Luuka aho yari yagiye kwiyamamariza.

Abanyamategeko be basabye ko arekurwa kubera ko ari umudepite wubashywe, ndetse akaba n’umukandida mu matora y’umukuru w’igihugu ateganyijwe mu ntangiriro z’umwaka utaha.

Leta ya Uganda ku rundi ruhande yo yasabye urukiko gutesha agaciro ingwate ye, ngo kuko ibyaha aregwa bifite akamaro ku gihugu.

Umucamanza yavuze ko Bobi Wine afite ibisabwa byose byatuma arekurwa, gusa amusaba gukurikiza amabwiriza arebana n’ibikorwa byo kwiyamamaza.

Ati: "Kuba uregwa ari umukandida Perezida, agomba gukurikiza amabwiriza yashyizweho na Komisiyo y’amatora n’amabwiriza ya Minisiteri y’Ubuzima."

Yasabye Bobi Wine kutarenza abantu 200 mu bikorwa byo kwiyamamaza.

Urubanza rwa Bobi Wine ruzasubukurwa ku wa 18 Ukuboza.

like
0
dislike
0
love
0
funny
0
angry
0
sad
0
wow
0