Umugore woherereje Trump ibaruwa irimo uburozi yafashwe afite n'imbunda

Umugore woherereje Trump ibaruwa irimo uburozi yafashwe afite n'imbunda

Umugore ukekwaho koherereza Perezida wa Leta Zunze Ubumwe za Amerika, Donald Trump, ibaruwa irimo uburozi bw’imbuto z’ikibonobono yatawe muri yombi ubwo yageragezaga kwinjira muri Amerika avuye muri Canada anyuze ku mupaka wo muri Leta ya New York.

Uyu mugore wafashwe afite imbunda, yatawe muri yombi n’inzego zishinzwe umutekano muri Amerika. Amazina ye ntiyigeze atangazwa, ndetse uyu munsi byitezwe ko agezwa imbere y’urukiko.

Mu ntangiriro z’iki Cyumweru nibwo iyi baruwa yabonywemo uburozi ubwo yagenzurwaga kugira ngo yemererwe kwinjira muri White House nk’ubutumwa bugenewe umukuru w’igihugu.

Nyuma y’igenzura nibwo byaje kwemezwa ko iyi baruwa irimo uburozi bw’imbuto z’icyatsi cyitwa ricin, kizwi nk’ikibonobono mu Kinyarwanda.

Uburozi bw’ikibonobono bwangiza umuntu uburiye ku buryo aruka, akavira imbere ndetse ingingo ze zimwe ntizikore neza. Nta muti uzwi ushobora kuvura ubu burozi. Umuntu uriye ubu burozi ashobora gupfa nibura mu gihe cy’amasaha 36 na 72 mu gihe atitaweho n’abaganga.