Umuhanzi King Bayo, mubyara wa Jules Sentore wari urangije Masters muri Senegal yitabye Imana

Umuhanzi King Bayo, mubyara wa Jules Sentore wari urangije Masters muri Senegal yitabye Imana

Umuhanzi Ishimwe Soumare Frank wamenyekanye muri muzika nka King Bayo, akaba yari mubyara wa Jules Sentore yitabye Imana ku myaka 33 y’amavuko azize uburwayi.

Mu gitondo cyo kuri uyu wa Gatandatu, tariki 21 Ugushyingo 2020 nibwo hamenyekanye inkuru y’incamugongo ko umuhanzi Ishimwe yitabye Imana. Uyu musore yari afite imyaka 33, kuko yavutse tariki 31 Mutarama 1987.

Yari asanzwe atuye muri Mali ari naho yakoreraga umuziki, yitabye Imana ari i Kigali aho yari yaje mu biruhuko no gusura umuryango we.

King Bayo ni umusore wakuranye na Jules Sentore akaba na mubyara we, bose bahuje kuba bararerewe kwa sekuru Sentore Athanase, ubyara Masamba Intore.

Abinyujije ku mbuga ze nkoranyambaga, Jules Sentore yashyizeho amafoto y’uyu musore ayakurikiza ishusho y’umutima umenetse. Nyuma yongeyeho ifoto bari kumwe arangije agira ati ”Kubyakira birangoye.”

Sentore yagize ati ”Yagiye, ubu nibwo nabyemera. Nabimenye mu ma saa cyenda z’ijoro nanga kubyemera ariko ubu ndabyiboneye.”

Yakomeje agira ati “Ubundi yari atuye muri Mali, mu minsi ishize yaje inaha aje gusura umuryango we, mu ijoro rero yaje kugira ikibazo cyo guhumeka kuko yari asanzwe arwara indwara z’ubuhumekero, yamerewe nabi birangira yitabye Imana.”

King Bayo wakuriye mu muryango w’abanyamuziki yinjiye mu muziki neza mu 2017, awutangirira muri Mali aho yari atuye.

Icyo gihe yasohoye indirimbo yise ‘Lover boy’ yakoranye n’umuhanzi wo muri Mali witwa Buba.

Yahise akomerezaho afatanya na Jules Sentore mu ndirimbo yakunzwe cyane bise ‘Diarabi’. Nyuma yakoze izindi zirimo iyo yise Paradizo na Ntibizongera yakoze yifatanya n’abanyarwanda Kwibuka Jenoside yakorewe Abatutsi mu 1994.

Yari yararangije amasomo ya Kaminuza afite impamyabumenyi y’icyiciro cya gatatu cya Kaminuza mu bijyanye n’Ubukungu yakuye muri Sénégal.

King Bayo ni mubyara wa Jules Sentore banareranywe

King Bayo yari yaraminuje mu masomo ajyanye n'ubukungu muri Kaminuza yo muri Sénégal

Mu 2018 yifatanyije n'abanyarwanda batuye muri Mali mu birori byo kwizihiza imyaka 24 yari ishize u Rwanda rwibohoye