Umuhanzi Lion Gaga yasohoye indirimbo yise ’Rekura Amazi’ yavugishije benshi

Umuhanzi Lion Gaga yasohoye indirimbo yise ’Rekura Amazi’ yavugishije benshi
Umuhanzi Lion Gaga, yashyize hanze indirimbo nshya yise "Rekura Amazi," yiganjemo amagambo y’ibishegu aharawe cyane n’abahanzi nyarwanda bakora umuziki ugezweho muri iyi minisi.

Iyi ndirimbo iri mu njyana ya ’Reggae’, igizwe n’iminota 3 gusa nk’uko umuhanzi atangira abivuga mu ndirimbo, aho agira ati" Indirimbo nkuririmbira ni iy’urukundo ngukunda. Nk’ibisanzwe ntabwo itinda ni iminota 3 gusa".

Muri iyi ndirimbo, hari aho Lion Gaga agira ati “Ni ya ’micro’ ujya ukunda kuko nzi kuyikoresha, buhoro buhoro ni ko ntangira, nyuma imiguruko maze nkarangiza". Arakomeza mu nyikirizo ati" Rekura amazi, amarira y’ibyishimo, rekura amazi ndabizi waryohewe.”

Amashusho y’iyi ndirimbo hari aho agaragaza umukobwa ari mu bwogero yambaye ubusa, ndetse ahandi Lion akagaragara ari kumwe n’uwo mukobwa amukorakora, ari nako amusiga amavuta akoreshwa muri ’massage’ akamumasa umubiri wose. Mu magambo agize igitero cya kabiri, hari aho agira ati" Iyizire nkwihere umuneke shenge wari uwukumbuye, nurangiza umire igikoma disi ni cyiza mu buzima.

Si ubwa mbere Lion Gaga akora indirimbo nk’iyi kuko ubwo yashyiraga hanze amashusho y’indirimbo ‘Ba Intwari’, byateje impaka cyane kubera amashusho arimo y’abakobwa bambaye ubusa hejuru.

Nyuma y’iyi ndirimbo n’izindi nka ‘Igare’ ya Mico, ‘Saa Moya’ ya Bruce Melody, ‘Tokeni’ ya Young Grace, ‘Ntiza’ ya Mr Kagame, ‘Micro’ ya Davis D n’izindi nyinshi, abantu bakomeje kwibaza aho umuziki nyarwanda werekeza.

like
1
dislike
0
love
0
funny
1
angry
0
sad
0
wow
0