Umuntu wa mbere wishwe na Coronavirus mu Rwanda yamenyekanye

Umuntu wa mbere wishwe na Coronavirus mu Rwanda yamenyekanye

Kuva icyorezo cya Coronavirus cyagera mu Rwanda kuwa 14 Werurwe 2020 ubwo habonekaga umuntu wa mbere wanduye iyi ndwara, hari hashize amezi 2 nta muntu n'umwe irahitana, gusa kuri ubu byamaze guhinduka kuko kuri uyu wa Gatandatu tariki 30 Gicurasi 2020 habonetse umuntu wa mbere wishwe n'iyi ndwara.

Uyu muntu wa mbere witabye Imana yishwe na Covid-19, yari umushoferi w'imyaka 65 nk'uko tubikesha itangazo rya Minisiteri y'Ubuzima (MINISANTE) rigira riti "Umurwayi witabye Imana yari umushoferi w'imyaka 65 wari utuye mu gihugu cy'abaturanyi wahisemo gutaha mu Rwanda nyuma yo kuremba. Yitaweho n'abaganga mu kigo cyagenewe kuvura Koronavirusi. Ariko yaje gupfa azize kwangirika imyanya y'ubuhumekero".

Kugeza ubu mu Rwanda hamaze kuboneka abantu 359 harimo bane (4) babonetse uyu munsi, banduye iki cyorezo cya Covid-19. Abamaze gukira iyi ndwara ni 250 harimo batatu (3) bakize uyu munsi. Abakirwaye ni 108, mu gihe hamaze gupfa umuntu umwe. Ibipimo bimaze gufatwa byose hamwe ni 66,976 harimo ibipimo 1,368 byafashwe uyu munsi.

Ku Isi hose abantu bamaze kwandura Coronavirus yakomotse mu Bushinwa, ni 6,102,522, abamaze gukira ni 2,708,442 naho abamaze guhitanwa n'iyi ndwara ni 369,127. Leta Zunze Ubumwe za Amerika ni yo iri ku isonga mu bihugu byibasiwe cyane n'iki cyorezo aho iza imbere mu kugira abantu benshi bamaze kwandura (1,809,885) ndetse ni nayo ifite abantu benshi bamaze kwicwa n'iki cyorezo (105,231).


Umushoferi w'imyaka 65 abaye uwa mbere wishwe na Coronavirus mu Rwanda