Umunyarwanda yemeye ko yatwitse Kiliziya ya Nantes abisabira imbabazi

Umunyarwanda yemeye ko yatwitse Kiliziya ya Nantes abisabira imbabazi
Umunyarwanda uherutse gutabwa muri yombi kugira ngo abazwe iby’inkongi y’umuriro yafashe Katedarali ya Kiliziya ya Nantes mu Bufaransa, yageze aho yemera ko yagize uruhare muri iyi nkongi y’umuriro.

Uyu Munyarwanda w’imyaka 39 y’amavuko wakoraga nk’umukorerabushake kuri iyi katedarali ya Nantes, yatawe muri yombi na Polisi y’u Bufaransa kuwa 18 Nyakanga 2020, nyuma y’uko ifashwe n’inkongi y’umuriro kuwa 17 Nyakanga bikagaragara ko ariwe wari wahakoreye ku munsi wabanjirije inkongi.

Nyuma yo gutabwa muri yombi yaje kurekurwa, Umushinjacyaha mu rukiko rwa Nantes, Pierre Sennes yatangaje ko hagiye gukorwa iperereza ry’ibanze ku cyaba cyateje iyi nkongi, ubu akaba yongeye gutabwa muri yombi nyuma y’icyumweru cyari gishize arekuwe.

Ibitangazamakuru byo mu Bufaransa nka Le Monde na AFP, byatangaje ko kuri uyu wa Gatandatu tariki 25 Nyakanga, Umushinjacyaha Pierre Sennes, mu kiganiro n’itangazamakuru yatangaje ko ibimenyetso byakusanyijwe byagaragaje ko uyu munyarwanda utari watangarizwa umwirondoro ahamwa no kugira uruhare muri iriya nkongi, nawe ubwe mu bibazo yakomeje guhatwa akaba yageze aho akemera ko yabigizemo uruhare.

Pierre Sennes mu nkuru ya Le Monde yagize Ati: “(uregwa) yemeye mu kumuhata ibibazo bwa mbere, ko yakongeje impande zayo eshatu.”

Yakomeje ati: “Ibimenyetso bya mbere byabonetse byatanzwe na laboratwari ya polisi y’i Paris ni byo byatumye twongera kumufunga.” Umushinjacyaha Pierre Sennes yavuze ko kugeza ubu hatari hamenyekana icyateye ‘uregwa’ gutwika iriya kiliziya kuko Hubert Champenois uyiyobora yemeza ko yari umukozi mwiza yizera kimwe n’abandi. Ubu yongeye gufungwa kugirango azagezwe mu rukiko.

Uyu munyarwanda nawe yemera uruhare rwe ndetse akanabyicuza nk’uko umwunganira mu mategeko, Me Quentin Chabert abivuga. Ati: “Umukiriya wanjye yabigizemo uruhare. Aricuza cyane rwose ndetse no kubyemera byatumye abohoka, uyu munsi arasaba imbabazi kandi ababajwe cyane n’ibyabaye.”

Uyu Munyarwanda bivugwa ko yari amaze imyaha irenga ine akora nk’umukorerabushake kuri iyi Katedarali ya Nantes yubatswe mu 1434 ikuzura neza mu 1891, ikaba yari yaragizwe hamwe mu hantu nyaburanga hasurwa na ba mukerarugendo mu Bufaransa.

What's Your Reaction?

like
0
dislike
0
love
0
funny
0
angry
0
sad
0
wow
0