Umunyarwandakazi mu bakobwa 18 bari gushakishwamo Miss Afrique Canada 2019 (Amafoto)

Damarce Heshima yaserukiye u Rwanda mu irushanwa ry’ubwiza rya Miss Afrique Canada rihurije hamwe abakobwa bakomoka muri Afurika bo mu bihugu bitandukanye, ariko baba muri iki gihugu.

Umunyarwandakazi mu bakobwa 18 bari gushakishwamo Miss Afrique Canada 2019 (Amafoto)

Damarce Heshima yaserukiye u Rwanda mu irushanwa ry’ubwiza rya Miss Afrique Canada rihurije hamwe abakobwa bakomoka muri Afurika bo mu bihugu bitandukanye, ariko baba muri iki gihugu.

Uyu mukobwa ufite inkomoko mu Rwanda, yavukiye muri Tanzania, yiga ibijyanye na politiki muri Kaminuza ya Québec muri Canada.

Ku rubuga rwa Miss Afrique Canada banditse bagaragaza ko Damarce Heshima kuva mu bwana bwe yakuze ari umukobwa w’ishyaka ryinshi ndetse kuva mu mashuri abanza yagaragaraga mu bikorwa bifitiye akamaro sosiyete ndetse mu mashuri yisumbuye aza kuba umwe mu banyeshuri bahagarariye abandi.

Bakomeza bavuga ko kuba arangwa no gukomera ku cyo yiyemeje, kudacika intege no gukora cyane ari bimwe mu byatumye agera ku mishinga itandukanye ituma kugeza uyu munsi nawe yumva atewe ishema nayo.

Damarce Heshima ahatanye n’abandi bakobwa 17 yambaye nimero 15, abo bahatanye barimo abakomoka mu bihugu nka Sénégal, Côte d’Ivoire, Cameroun, Congo-Brazzaville, RDC, Guinée Conakry, Gabon, Benin, Nigéria, Burkina Faso, Mali, u Burundi n’u Rwanda.

Iri rushanwa ari guhatanamo ritegurwa na sosiyete yitwa Miss Afrique Canada (MAC) isanzwe itegura amarushanwa ahuza abakobwa bakomoka muri Afurika mu kububakamo imbaraga n’icyizere cy’ejo hazaza.

Miss Afrique Canada igamije guhuriza hamwe abakobwa bakibyiruka bo muri Afurika ariko batuye muri Canada mu kubaha ubumenyi no kubaremamo icyizere no kwitinyuka nk’uko bigaragara ku rubuga rw’iri rushanwa.

Umwaka ushize ikamba rya Miss Afrique Canada ryegukanywe n’umukobwa ukomoka muri Nigeria witwa Wuraola Taibat Adeyemi naho uwitwa Safiatou Barry wo muri Guinea aba igisonga cya Mbere mu gihe Uwase Nancy Sibylle ukomoka mu Rwanda yabaye igisonga cya Kabiri.

Miss Afrique Canada izasozwa ku itariki ya 21 Kamena 2018 mu birori bizabera mu Mujyi wa Montréal. Aba bakobwa bose baziyerekana mu mbyino no mu bikorwa bitandukanye bazakora buri wese yerekana umwimerere w’igihugu cye.

Damarce Heshima niwe uhagarariye u Rwanda muri iri rushanwa rya Miss Afrique Canada

Nancy Sibylle Uwase waserukiye u Rwanda mu irushanwa ry’ubwiza rya Miss Afrique Canada umwaka ushize