Umuyobozi w’Umujyi wa Londres yagereranyije Trump n’umwana w’imyaka 11

Umuyobozi w’Umujyi wa Londres yagereranyije Trump n’umwana w’imyaka 11

Umuyobozi w’Umujyi wa Londres mu Bwongereza, Sadiq Khan, yavuze ko ibyo Perezida wa Leta Zunze Ubumwe za Amerika, Donald Trump, yamuvuzeho ku rubuga rwe rwa Twitter, ari nk’ibikorwa by’umwana w’imyaka 11.

Kuva ku wa Mbere, Perezida Trump ari mu ruzinduko rw’iminsi itatu mu Bwongereza, mbere y’uko ajyayo yanditse ko Umuyobozi w’Umujyi wa Londres, Sadiq Khan, ari nk’ibuye rikonje ko akwiye guhangana n’ibyaha biri mujyi abereye umuyobozi.

Mu kiganiro yahaye BBC, Khan yagize ati “Nari mu nama ubwo ibi byandikwaga, narabibwiwe ariko ntabwo nemeye ko ari ukuri, icya mbere natekereje ko ari imikino, ko ari ibintu n’umuntu w’imyaka 11 ashobora gukora.”

Khan yavuze ko asanzwe ashima imibanire myiza iri hagati y’igihugu cye na Amerika, ariko ko Perezida uriho uyu munsi adakwiye guhabwa icyubahiro asuye u Bwongereza.

Bimwe mu byo Khan ashinja Perezida Trump birimo kuba ngo yaratandukanyije abana n’ababyeyi b’abaturage bakomoka muri Mexique, uburyo yivanye mu masezerano ya Paris ajyanye no kurengera ibidukikije n’ibindi.

Perezida Trump we yabwiye Khan ko yamugereranya n’umuyobozi w’Umujyi wa New York, de Blasio.

Trump yagize ati “Khan yanyibukije umuyobozi w’umujyi wa New York de Blasio na we udafite ubushobozi.”

Mu ruzindiko Trump arimo mu Bwongereza, abaturage batari bake muri iki gihugu barenga ibihumbi 200 bitabiriye imyigaragambyo imwamagana, bafite ibyapa bigaragaza ko batishimiye ibikorwa bye birimo nk’aho bamubwiraga ko adakwiye guteza intambara muri Iran n’ibindi.

Trump yanenze ko ari umunyantegenke undi nawe avuga ko amagambo ye ari nk'ay'umwana