Urukiko rwategetse isuzumwa rya raporo y’icyishe Pasiteri Maggie Mutesi

Urukiko Rukuru rwatagetse Minisiteri y’Ubuzima gushaka itsinda ry’inzobere eshatu mu gusuzuma icyahitanye umuntu kugira ngo zikore isuzuma ryimbitse kuri raporo igaragaza icyahitanye Pasiteri Maggie Mutesi.

Urukiko rwategetse isuzumwa rya raporo y’icyishe Pasiteri Maggie Mutesi

Urukiko Rukuru rwatagetse Minisiteri y’Ubuzima gushaka itsinda ry’inzobere eshatu mu gusuzuma icyahitanye umuntu kugira ngo zikore isuzuma ryimbitse kuri raporo igaragaza icyahitanye Pasiteri Maggie Mutesi.

Raporo ya muganga yagaragaje ko Pasiteri Maggie Mutesi witabye Imana ku Cyumweru cyo ku wa 10 Nzeri 2017 yishwe anizwe.

Umugabo we witwa Mugisha Drake ni we wahise atabwa muri yombi ndetse nyuma urukiko rwisumbuye rumukatira igifungo cya burundu nyuma yo kumuhamya icyaha.

Mu bujurire, Mugisha yamaganye raporo urukiko rwisumbuye rwashingiyeho rumuhamya icyaha, avuga ko yahimbwe kugira ngo babone uko bamufunga.

Yavuze ko iyo raporo yakozwe n’umuganga udafite ubuzobere mu gusuzuma imirambo bityo idakwiriye kwizerwa.

Raporo yakozwe na muganga Dr Lynnette Kyokunda Tumwine wo mu bitaro byitiriwe Umwami Faisal.

Urukiko rukuru rwategetse ko hakorwa isesengura kuri iyo raporo ya muganga Kyokunda, hakagaragazwa niba ibyo yerekanye ari byo.

Mu bigomba kwibandwaho, urukiko rwasabye ko iryo tsinda ry’inzobere zigaragaza niba raporo ya Kyokunda ikwiriye gushingirwaho n’urukiko rufata umwanzuro. Icya kabiri ni ukugaragaza ukuri nyako mu gihe baba basanze raporo ya muganga wa mbere itashingirwaho.

Icya gatatu urukiko rwategetse ni uguha iryo tsinda amezi abiri, ni ukuvuga Kamena na Nyakanga yo kuba barangije gukora raporo y’igenzura igashyikirizwa urukiko nkuko The New Times dukesha iyi nkuru ibitangaza.

Mugisha yanze raporo ya Kyokunda avuga ako yakozwe n’umunyamahanga ukomoka muri Uganda utemerewe gukora ako kazi ku butaka bw’u Rwanda.

Mugisha yahoze ari umusirikare w’ipeti rya Kapiteni mu Ngabo z’u Rwanda. Yasezerewe mu ngabo mu 2017. Yari afitanye na nyakwigendera abana batatu.

Hari hashize imyaka itatu Mugisha na Mutesi batabana mu nzu kubera amakimbirane ndetse muri Nyakanga 2016 bari baragiye gusaba gatanya nyuma barabihagarika batangira inzira yo kwiyunga.

Pasiteri Mutesi Maggie yari umushumba w’Itorero, Gates of Heaven Ministry, rifite icyicaro ku Muhima mu Mujyi wa Kigali. Yamenyekanye mu bikorwa by’amasengesho yateguraga buri kwezi ahuza abayobozi b’amatorero atandukanye yaberaga muri Serena Hotel agamije gusengera ububyutse mu Rwanda.