USA : Intambara y'ubutita irakomeje hagati ya Michelle Obama na Perezida Trump

USA : Intambara y'ubutita irakomeje hagati ya Michelle Obama na Perezida Trump

Michelle Obama, umufasha wa Barack Obama wahoze ayobora Leta Zunze Ubumwe za Amerika yavuze ko igihugu cye kiyobowe n’umuntu utabikwiriye ari we Perezida Donald Trump.

Yabitangaje kuri uyu wa Mbere mu nteko rusange idasanzwe y’ishyaka ry’aba-democrates ari nayo izemerezwamo bidasubirwaho Joe Biden nk’uzahagararira iryo shyaka mu matora ya Perezida mu Ugushyingo uyu mwaka.

Muri iyo nteko kandi hitabiriye na bamwe mu bayoboke b’ishyaka ry’aba-republicain Trump akomokamo, bitandukanyije nawe bakaba bashyigikiye Joe Biden.

Kubera icyorezo cya coronavirus iyo nteko idasanzwe yabaye mu buryo bw’ikoranabuhanga.

Michelle Obama yavuze ko ibyo wakora byose, udashobora kubeshya ko hari ibyo wakoze uri Perezida mu gihe bitagaragarira amaso y’abantu.

Uyu mugore uzwiho kuvuga imbwirwaruhame zizamura amarangamutima ya benshi, yavuze ko ubukungu bwa Amerika buri ku manga kubera Perezida udashoboye wananiwe guhashya icyorezo cya Coronavirus.

Yagize ati “Ubukungu bwacu bwarashwanyaguritse kubera virusi Perezida yakomeje gusuzugura.”

Yavuze ku bibazo byo kwibasira abirabura bimaze iminsi, ndetse n’imyigaragambyo ibyamagana yagiye iba, igahura n’imbaraga z’umurengera za polisi. Trump yari aherutse kuvuga ko azakoresha n’igisirikare mu guhosha iyo myigaragambyo.

Michelle Obama yagize ati “Buri gihe iyo twitabaje ibiro bya Perezida, cyangwa se dushaka uduhumuriza, icyo duhabwa ni imvururu, amacakubiri no kubura udutega amatwi.”

Yavuze ko mu myaka ine ishize Trump ari ku butegetsi, ushatse kuyisobanurira abana bitakoroha.

Ati “Ibaze ko babona abayobozi bacu bita abaturage babo ngo ni abanzi b’igihugu. Bareba abandi bana bagenzi babo batandukanywa n’imiryango yabo bakajugunywa mu bisa nka gereza, bakabona abigaragambya baraswa.”

Yakomeje agira ati “Donald Trump ni Perezida mubi igihugu cyacu gifite. Yahawe igihe kirenze igikenewe ngo yerekane ko ashoboye akazi, ariko ikigaragara byaramurenze. Ntabwo ashoboye kuba uwo twifuza.”

Michelle Obama yabwiye abanyamerika ko niba bashaka ko ubuzima bwabo buhinduka, batora Joe Biden.

Donald Trump uzwiho kutaripfana yahise asubiza Michelle Obama aciye kuri Twitter, ko atakabaye ari Perezida iyo aba ataraje gukosora amakosa yakozwe n’umugabo we Barack Obama.

Ati “Hagire umbwirira Michelle Obama ko Donald Trump atari kuba ahari muri Perezidansi ya Amerika, iyo bitaba ibyakozwe n’umugabo wawe, Barack Obama.”

Amatora ya Perezida muri Amerika azaba tariki 3 Ugushyingo uyu mwaka. Ishyaka rya Trump naryo riteganyije inama idasanzwe mu cyumweru gitaha ari nayo izemerezwamo Donald Trump nk’umukandida waryo mu matora ataha.