USA:Uzajya yikingiza covid-19 azajya ahabwa amadorale 100$

USA:Uzajya yikingiza covid-19 azajya ahabwa amadorale 100$

Perezida wa Leta Zunze Ubumwe za Amerika, Joe Biden, yasabye ko hashyirwaho gahunda yo guha amadorali 100 (asaga ibumbi 100 Frw) umuturage wese w’iki gihugu wikingije COVID-19 nk’uburyo bwo gukangurira abantu kwikingiza.

Ibi Perezida Joe Biden yabigarutseho ku wa 29 Nyakanga 2021, mu ijambo yagejeje ku baturage agaruka ku buryo bwo kwagura ibikorwa byo gukingira muri iki gihugu.

Kugeza ubu muri Leta Zunze Ubumwe za Amerika hari ikibazo cy’uko ibikorwa byo gukingira COVID-19 byatangiye kugenda biguru ntege kandi mu by’ukuri byaratangiye bifite imbaraga.

Kugeza ubu muri Amerika abaturage bamaze gukingirwa bangana na miliyoni 164 bangana na 49,8% by’abaturage b’iki gihugu bose, gusa hari impungenge z’ubwitabire bugenda bugabanuka.

Mu rwego rwo gukomeza gushyira imbaraga mu bikorwa byo gukingira, Biden yasabye ko umuturage uzajya ukingirwa azajya ahabwa 100$.

Perezida Biden kandi yasabye igisirikare kongera urukingo rwa COVID-19 mu zitegetswe ku basirikare.

Amerika kandi yongeye gukaza ingamba zo kwirinda COVID-19 zirishyiraho amabwiriza mashya arimo ko abakozi ba Leta bagomba kwikingiza COVID-19.

Ibi byemezo bikubiye mu itangazo ryashyizwe hanze n’ibiro bya Perezida (White House) ku wa 29 Nyakanga 2021.

Aya mabwiriza mashya asaba abakozi ba Leta bose kwikingiza, abatabikoze bakambara agapfukamunwa igihe cyose ndetse bakipimisha COVID-19 mu buryo buhoraho, nibura kabiri mu cyumweru.

Abakozi ba Leta batarikingiza kandi basabwe ko bazajya bagabanya ingendo bakora kugira ngo bitabashyira mu byago byo kwandura.

Kugeza ubu Leta Zunze Ubumwe za Amerika kimwe n’ibindi bihugu ihangayikishijwe n’ubwoko bushya bwa Coronavirus bwa Delta buri gutuma umubare w’abandura COVID-19 n’abo ihitana urushaho kwiyongera.

Perezida Biden yasabye ko uzajya yikingiza COVID-19 yazajya ahabwa 100$