Uwakiniraga APR muri Basketball nawe yiyunze ku barwanya ubutegetsi bw’u Rwanda

Uwakiniraga APR muri Basketball nawe yiyunze ku barwanya ubutegetsi bw’u Rwanda

Nyuma ya Nshimiyimana Iddi wamenyekanye nk’umukinnyi ukina mu b’inyuma mu ikipe ya Rayon Sports, Ntibiramira Giovanni wakiniraga APR Basketball Club nawe yinjiye byeruye mu mitwe irwanya ubutegetsi bw’u Rwanda, atangira no kwinjiza abandi banyarwanda bahuriye mu Bubiligi.

Uyu wahoze ari umukinnyi wa APR Basketball Club, Ntibiramira Giovanni n’abandi basore bagenzi be barimo uwitwa Murwanashyaka Salomon na Ufitamahoro Marie Josée ubu babarizwa byeruye mu mitwe irwanya ubutegetsi bw’u Rwanda aho bari mu Bubiligi.

Amakuru dufite ni uko aba bose bahuriye mu Bubiligi ubwo Ntibiramira Giovanni yavaga mu Rwanda agiye kwiga, aza guhurirayo na Murwanashyaka Salomon baba inshuti, bombi baza guhura n’uwitwa Ufitamahoro Marie Josée usanzwe uba muri iyo mitwe ndetse wakoranaga cyane na Nshimiyimana Iddi abajyana mu barwanya Leta y’u Rwanda.

Aba bombi rero bagiye muri iyo mitwe nyuma y’uko Ntibiramira wahoze ukinira APR BBC ahagaritse amashuri, ajyana n’inshuti ye Murwanashyaka Salomon gutiza umurindi iyo mitwe irwanya Leta y’u Rwanda. Bakiriwe na Ufitamahoro Marie Josée hamwe na Nshimiyimana Iddi bari bayirambyemo bakomeza ibyo bikorwa ari nako basebya u Rwanda bisunze cyane ishyaka ritemewe rya FDU Inkingi ryahoze ari irya Ingabire Victoire akaza kwitandukanya naryo,

Bamaze igihe bagaragaza ko bashyigikiye abarwanya ubutegetsi bw’u Rwanda barimo n’abo inzego z’ubugenzacyaha zivuga ko bazazanwa i Kigali bakagezwa imbere y’ubutabera.

Uretse ku mbuga nkoranyambaga, banakunze kugaragara kenshi mu bikorwa by’imyigaragambyo mu Bubiligi bashimangira byeruye ko bifatanyije n’abarwanya ubutegetsi bw’u Rwanda.

Uhereye ibumoso : Nshimiyimana Iddi, Ufitamahoro Josée, Murwanashyaka Salomon na Ntibiramira Giovanni