Uwimabera uherutse kuza mu Rwanda gushyingura abe bazize Jenoside yakorewe Abatutsi yasanzwe yapfiriye mu bwogero mu Bubiligi

Uwimabera uherutse kuza mu Rwanda gushyingura abe bazize Jenoside yakorewe Abatutsi yasanzwe yapfiriye mu bwogero mu Bubiligi

Umunyarwanda witwa Uwimabera Rosalie yasanzwe yapfiriye mu bwogero aho yabaga mu Mujyi wa Louvain uherereye mu Bubiligi ku mugoroba wo ku wa Kabiri, tariki ya 1 Werurwe 2019.

Uwimabera waherukaga mu Rwanda mu cyumweru gishize yaje mu muhango wo gushyingura imibiri 100 y’abazize Jenoside yakorewe Abatutsi iheruka gutahurwa mu Murenge wa Rwezamenyo mu Mujyi wa Kigali, bikekwa ko ashobora kuba yazize indwara y’umutima.

Iyo mibiri yashyinguwe mu cyubahiro mu Rwibutso rwa Nyanza ya Kicukiro, yatahuwe ahahoze urugo rw’umubyeyi we witwa Jean Baptiste Rwagasana na we wahiciwe.

Perezida wa IBUKA, Prof Jean Pierre Dusingizemungu, yabwiye The New Times ko umukobwa wa Uwimabera ariwe wamusanze yapfiriye mu bwogero nyuma yo kwikubitamo.

Prof Dusingizemungu yavuze ko urupfu rwa Uwimabera rukiri urujijo ariko ko umukobwa we yavuze ko bishobora kuba bifitanye isano n’urupfu ababyeyi be bishwe mu myaka 25 ishize Jenoside ibaye.

Ati “Nta gushidikanya ko yashenguwe n’uko bishwe ariko nanone ntiwabura kubihuza n’igikorwa cyo gushyingura iriya mibiri y’abazize Jenoside mu cyumweru gishize. Yari ari aho umuryango we wose wiciwe.”

Prof Dusingizemungu yavuze ko bibabaje cyane kumva umuntu yapfuye amaze kubona imibiri y’abiwe bishwe.

Nyuma yo gushyingura iyo mibiri yatahuwe irimo n’abo mu muryango we, Uwimabera yari yabwiye itangazamakuru ko ashimishijwe no kuba abashije kubona imibiri y’abiwe bishwe akabishyingurira.

Uwimabera yabanaga na Mutabazi Eugène babyaranye abana babiri.