Volleyball U20: Misiri yatsinze u Rwanda yegukana igikombe cya Afurika

Misiri yisubije igikombe cya Afurika muri Volleyball y’abatarengeje imyaka 20, nyuma yo gutsinda u Rwanda amaseti atatu ku busa mu irushanwa ryaberaga muri Kenya.

Volleyball U20: Misiri yatsinze u Rwanda yegukana igikombe cya Afurika
5qmedias

Misiri yisubije igikombe cya Afurika muri Volleyball y’abatarengeje imyaka 20, nyuma yo gutsinda u Rwanda amaseti atatu ku busa mu irushanwa ryaberaga muri Kenya.

U Rwanda ni ku nshuro ya mbere rwari rugeze ku mukino wa nyuma muri iki cyiciro rukaba rwarakatishije itike rusezereye Cameroun muri ½.

Kuri iki Cyumweru rwahuye na Misiri nayo yasezereye Nigeria muri ½ by’umwihariko ikaba ariyo ifite igikombe giheruka.

Ni umukino wagoye abangavu b’u Rwanda cyane ndetse bawutakaza ku maseti atatu ku busa.

Mu iseti ya mbere bihagazeho mu gutangira bagira amanota icyenda banganya na Misiri ariko aba aribwo itangira kubasiga igira amanota 15 bafite 12, igira 20 bari kuri 16 yegukana iseti ifite 25-18.

Iseti ya kabiri yo Abanya-Misiri bayihariye kuva igitangira bagira amanota 12 u Rwanda rufite atanu bayegukana ku manota 25-10.

Iseti ya nyuma abangavu b’u Rwanda bongeye kwihagararaho mu ntangriro bagira amanota atandatu banganya na Misiri ariko ibarusha inararibonye igira 13 bafite icyenda inayegukana ku manota 25 bafite 13.

Mu guhatanira umwanya wa Gatatu Cameroun yatsinze Nigeria amaseti 3-1, Kenya yakiriye irushanwa ikaba yasoje ari iya Gatanu, Congo Kinshasa iba iya Gatandatu, hakurikiraho Mauritius, Tanzania na Uganda ya nyuma.

N’ubwo u Rwanda rutegukanye igikombe, umusaruro rukuye muri iri rushanwa uri ku rwego rwo hejuru, by’umwihariko rukaba rwaranabonye itike yo kuzaserikira Afurika mu gikombe cy’Isi cya 2019.

Muri iri rushanwa rizabera Mexique, u Rwanda ruzajyana na Misiri. Biteganyijwe ko iyi kipe igaruka mu Rwanda kuri uyu wa Mbere saa 21:30 yegukanye umwanya wa Kabiri.

Mu bigaraga aba bangavu bihagazeho imbere y’ibihangange bya Afurika kuko yatsinze abamakipe menshi akomeye arimo nka Algeria na Cameroun.