Volleyball: Umunsi wa 3 wa shampiyona wasize UTB yisasiye Gisagara(AMAFOTO)

Volleyball: Umunsi wa 3 wa shampiyona wasize UTB yisasiye Gisagara(AMAFOTO)

Kuri uyu wa Gatandatu tariki ya 1 Ukuboza 2018 ubwo hakinwaga imikino y’umunsi wa gatatu wa shampiyona ya Volleyball, ikipe ya UTB VC yatsinze Gisagara VC amaseti 3-2, umukino w’ishyiraniro (Derby) wasozereje indi yose y’uyu munsi wa gatatu wanasize iyi kipe ibarizwa Kicukiro iri ku mwanya wa mbere.

Ni umukino wari ufite byinshi uvuze mu ku makipe yombi kuko magingo aya ikipe ya UTB VC itozwa na Nyirimana Fidele umutoza umaze kuba ubukombe akaba yaravuye muri Gisagara VC amaze kuyihesha ibikombe bibiri bya shampiyona. Ni UTB VC ikinamo abakinnyi nka Sibomana Placide bita Madison umukinnyi ukomeye haba mu ikipe ye n’ikipe y’igihugu. UTB VC kandi ifite abakinnyi barimo Mahoro Ivan umukinnyi mpuzamahanga ufite ubunararibonye mu gutanga imipira ibyara amanota mu mukino.

Seti ya mbere yatwawe na Gisagara VC irimo Akumuntu Patrick Kavalo wahoze ari kapiteni wa UTB VC, Gisagara VC yatsinze amanota 25 mu gihe UTB VC yari ku manota 19. Gisagara VC kandi yaje kwiyongeza seti ya kabiri n’amanota 25-23. Aha, abakunzi b’umukino wa Volleyball bari muri sitade nto ya Remera ku bwitabire buhagije, batangiye kwibwira ko aka UTB VC gashobotse kuko hari hasigaye ko Gisagara VC itsinda indi seti bityo ikaba intahana atatu.

Gusa mu iseti ya gatatu ibintu byaje guhinduka ahanini bitewe n’imibare ya Nyirimana Fidele umaze kwemeza abazi Volleyball ko asobanukiwe no gutoza cyane akaba intyoza mu gusoma umukino kabone n’iyo habura amanota aabarirwa ku ntoki ngo umutsinde. Ibi byaje gufasha UTB VC gutsinda seti ya gatatu ku manota 25-12. UTB VC yahise ibona umwuka uhagije ihita itsinda seti ya kane n’amanota 25-19. Amakipe yombi ahita nganya amaseti 2-2 bahita bajya mu manota 15 ya kamara mpaka (Seoul).  UTB VC yari mu mukino mu minota ya nyuma, yaje gutsinda kamarampaka ku manota 15 mu gihe Gisagara VC yari ikiri ku manota umunani (8).

Nyuma yo gutsinda uyu mukino, ubu UTB VC iyobiye urutonde rw’agateanyo rwa shampiyona n’amanota 14 kuko mu mikino itandatu imaze gukina yatsinze itanu (5) itsindwa umwe (1).

Kuri uyu munsi wa Gatatu wa shampiyona kandi, UTB VC yari yabanje kunyagira Kirehe VC amaseti 3-0 mu mikino wari wabanje mu masaha ya mbere ya saa sita (25-16,25-14 na 25-20).

Gisagara VC ifite igikombe cya shampiyona, yatsinzwe na UTB VC mbere yuko nayo yari yabanje kunyagira Kirehe VC amaseti 3-0 (25-16, 25-21 na 25-18).

AMAFOTO: