Yaciweho mu maso n'umugabo urwaye Covid-19 arapfa

Yaciweho mu maso n'umugabo urwaye Covid-19 arapfa
Umugore witwa Belly Mujinga w’imyaka 47 wari usanzwe ari umukozi wa Kompanyi ya gariyamoshi mu Bwongereza, yapfuye urw’amaherere nyuma yo gucirwa mu maso n’umugabo wari urwaye icyorezo cya Covid-19 akamwanduza ndetse nyuma ikaza kumuhitana.

Ibi byabaye muri Werurwe , ubwo abagore babiri bari bari mu biro bishinzwe kugurisha amatike ya gari ya moshi batatswe n’umugabo utaramenyekanye amazina akababwira ko arwaye iyi ndwara agahita abacira mu maso akanabakororeraho nk’uko Lusamba Gode Katalay, umugabo wa Nyakwigendera yatanze ubuhamya bw’ibyo umugore we yari yamubwiye.

Katalay yagize ati “ Umugabo yaraje abaza abagore icyo bari gukora, impamvu bari aho na bo bamusubiza ko bari ku kazi. Yahise ababwira ko afite Virus atangira kubacira no kubakororera hejuru, na bo bihutira kujya kubibwira ubahagarariye. Belly yaratashye ambwira buri kimwe cyose.”

Nyuma y’icyumweru bahise barwara banagaragaza ibimenyetso ni ko guhita bajyanwa mu bitaro bya Barnet ku itariki 02 Mata maze Mujinga yitaba Imana tariki 5 Mata 2020, agakomeza avuga ko umugore we yari amaze imyaka ine akora muri serivisi zo kugurisha amatike ya gari ya moshi muri iki kigo cya Govia Thomeslink Railway akaba yari umwe mu bakozi b’ingenzi bacyo.Katalay yanasobanuye ko umugore we yari anafite ikibazo cy’indwara z’ubuhumekero.

Ishami ry’Igipolisi cy’Ubwongereza rishinzwe ingendo n’ubwikorezi cyatangaje ko riri gukora iperereza kuri uru rupfu rw’amayobera n’ubwo polisi ivuga ko iki kibazo itigeze ikimenyeshwa ku gihe mu gihe abakozi bakorana na nyakwigendera n’abo mu muryango we bo bavuga ko bayimenyesheje.

Polisi yasabye umuntu wagira amakuru y’uyu muntu waciriye aba bakozi ko yakwihutira kuyatanga vuba ndetse n’umuvugizi w’ibiro bya Minisitiri w’Intebe w’Ubwongereza Boris Johnson, yavuze ko Leta yababajwe n’urupfu rw’uyu mugore kandi ko biteye agahinda kubona umukozi utanga serivisi rusange ku bantu benshi yatakwa muri ubu buryo bikanamuviramo urupfu.

Ubu mu Bwongereza abamaze kwandura Covid-19 bangana na 226,463 naho 32,692 bamaze guhitanwa n’iyi virusi.

What's Your Reaction?

like
0
dislike
0
love
0
funny
0
angry
0
sad
2
wow
0