Yari mubi, yaciye benshi amaguru, yica abana n’abagabo bacu- Abishimira imyaka 30 Bosco Ntaganda yakatiwe

Yari mubi, yaciye benshi amaguru, yica abana n’abagabo bacu- Abishimira imyaka 30 Bosco Ntaganda yakatiwe

Ibyishimo ni byose ku batuye mu Ntara ya Ituri muri Repubulika Iharanira Demokarasi ya Congo, nyuma y’aho Urukiko Mpuzamahanga Mpanabyaha, ICC rukatiye Bosco Ntaganda igihano cy’igifungo cy’imyaka 30.

Aba baturage bavuga ububi bwe, ko yishe abana, afata abagore ku ngufu, yica abagabo,... akaba yashinjwaga ibyaha 10 byamuviriyemo gukatirwa igifungo cy’imyaka 30.

"Njyewe n’abandi benshi hano twafashwe ku ngufu n’abantube, ibi ndabivugana amarira menshi, turacyababaye cyane kubera ibyo yadukoreye" - umugore wo mu karere ka Ituri aravuga ku gihano cyahawe Bosco Ntaganda.

Abagizweho ingaruka n’ibyaha byahamijwe Bosco Ntaganda mu karere ka Ituli muri DR Congo baravuga ko bishimiye ko yahanwe, gusa bakemeza ko imyaka yakatiwe ari micye.

"Turishimye cyane hano Zumbe, kuko ibintu Bosco Ntaganda yakoze hano ni ukwica abantu, abana bato abagore batwite… Yari mubi, yaciye benshi amaguru nunagenda hano urababona ibirema byinshi".

Uyu ni umugabo wo mu gace ka Zumbe mu ntara ya Ituri wabwiye BBC ko we n’abandi benshi muri aka gace bishimiye ko Ntaganda aryojwe ibyo yakoze.

Umugore umwe wo muri aka gace yabuze abo mu muryango bishwe n’abarwanyi bari bayobowe na Bosco Ntaganda hagati ya 2002 na 2003.

Avuga ko usibye kumwicira abe we kimwe n’abandi bagore n’abakobwa babafashe ku ngufu.

Ati: "Turacyababaye cyane kubera ibyo yadukoreye, abagabo bacu, abana bacu yarabishe n’ubu amarira aracyari yose".

Alfred Wilonja Tundula impirimbanyi y’uburenganzira bwa muntu avuga ko urukiko rwakoze neza guhana Ntaganda ariko atakoze ibyaha wenyine rwareba n’abandi bose bagahanwa.

Delphin Kapaya inzobere muri politiki yo mu burasirazuba bwa Congo aganira na BBC dukesha iyi nkuru,avuga ko we kimwe n’abandi banyekongo benshi ngo babona igihano Ntaganda yahawe ari gito cyane.

Bwana Kapaya ati: "Ntaganda yishe abantu benshi cyane none bamukatiye imyaka 30 kandi ubu amaze irindwi afunze, bivuze ngo asigaranye imyaka 23.

Azasohoka afite imyaka 67 kuri iyo myaka azaba agikomeye maze yidegembye, ibyo rero bizababaza roho z’abantu kubera ibyo yabakoreye, yishe abantu beshi cyane".

Bwana Kapaya avuga ko abanyekongo bifuzaga ko "afungwa ubuzima bwe bwose kugira ngo bibere abandi isomo kuko igihe azafunguka ibyo yakoze bizaba bikibukwa cyane".

Bosco Ntaganda afite iminsi 30 yo kujuririra iki gihano yahawe.