Yirukankiye kwa muganga nyuma yo gukoresha Super Glue mu musatsi ugafata ku mutwe burundu (Video)

Yirukankiye kwa muganga nyuma yo gukoresha Super Glue mu musatsi ugafata ku mutwe burundu (Video)

Ku mbuga nkoranyambaga hakwiriye amashusho y’umukobwa w’umunyamerika utuye muri leta ya Louisiana, wakoresheje Super Glue mu musatsi ukanga kweguka burundu, aho wamaze ukwezi kose ufashe ku mutwe, yigira inama yo kujya kwa muganga.

Nyuma yo gushirirwa n’amavuta yari asanzwe akoresha ngo umusatsi we ufate ku mutwe yitwa Go2B Spray, Tessica Brown, yahisemo gukoresha Super Glue yitwa Gorilla Glue Spray ngo umusatsi we ufate, maze ufata ku mutwe ufashe koko ntiwongera kweguka ku buryo byamusabye kugana abahanga mu buvuzi bw’uruhu.

Brown ukoresha amazina ya @im_d_ollady kuri Instagram, yashyize amashusho ku mbuga nkoranyambaga abwira abamukurikirana ko umusatsi we wafashe ku mutwe, udashobora kweguka, yagize ati “Umusatsi wanjye, ntabwo unyeganyega. Muri kumva ibyo mbabwira? Ntabwo unyeganyega, maze gufura mu mutwe inshuro 15.”

Mu yandi mashusho yafashe, yeretse abantu ko bidashoboka koko, afata shampoo (isabune bafurisha mu mutwe) ashyira mu mutwe afuramo biranga arangije afata igitambaro arayihanagura, umusatsi uguma ufashe ku mutwe.

Ku rubuga rwa Gorilla Glue Spray, bihanganishije Brown bamubwira ko idakoreshwa ku musatsi, kuko idakorana n’amazi 100% ni ukuvuga ko icyo yakora cyose akoresheje amazi itavaho.

Iyi Super Glue isanzwe ikoreshwa mu gufatanya impapuro, imyenda, imbaho n’ibyuma ukurikije amagambo yanditse ku icupa ryayo. Kugira ngo iveho bisaba gukoresha alcohol yitwa ‘acétone’ cyangwa ‘isopropyle’.

Kuwa Gatandatu nibwo Brown yashyize amafoto ku mbuga nkoranyambaga yagiye kwa muganga, ku ivuriro ryitwa St. Bernard Parish Hospital riherereye muri Chalmette muri Louisiana, kugira ngo bamufashe gukuramo Super Glue mu mutwe. Maze bamwandikira imiti irimo ‘acétone’ na ‘stérile’ kugira ngo imufashe.

Kugeza ubu ntabwo biragira icyo bitanga, gusa yanditse kuri Instagram ye ashimira abamubaye hafi bose, anabasaba gukomeza kumusengera ngo umusatsi we uzasubire uko wari umeze mbere.