Yvan Buravan yasabye RIB gukurikirana umutekamutwe wamwiyitiriye uri kwiba abantu

Yvan Buravan yasabye RIB gukurikirana umutekamutwe wamwiyitiriye uri kwiba abantu

Burabyo Yvan wamenyekanye cyane mu muziki w’u Rwanda nka Yvan Buravan kuri ubu uri kubarizwa ku mugabane w’u Burayi yasabye Ubugenzacyaha bw’u Rwanda gukurikirana umutekamutwe wamwiyitiriye akaba ari kwiba abantu.

Uyu mutekamutwe utaramenyekana ari kwifashisha imbuga nkoranyambaga yiyita Yvan Buravan ubundi akabwira abakunzi b’uyu muhanzi ko hari umushinga w’indirimbo ari gukorana na Diamond bityo akeneye ubufasha bwabo.

Uyu mutekamutwe abinyujije kuri Facebook yagize ati”Yvan Buravan ndabasuhuje kandi mbashimiye mbikuye ku mutima urukundo mukomeje kunyereka. Ariko ndamenyesha abafana banjye bw’umwihariko abakunzi banjye ko mfitanye umushinga na Diamond none nkaba mbasaba inkunga”.

Uwo mutekamutwe yanashyizeho nimero za telefone, asaba abamukurikira kumwoherereza ubufasha.

Uyu muhanzi akimara kubona ubu butumwa yahise abimenyesha Ubugenzacyaha bw’u Rwanda abasaba ko umuntu uri gukoresha iyi nimero yakurikiranwa cyane ko yamwiyitiriye kandi akomeje kwiba abantu ibyabo.

Yagize ati "Niba ari MTN cyangwa RIB ndabasaba kunkiza iyi nimero n’uyikoresha kuko si njyewe, nagiye numva inkuru nyinshi mbi z’abibeshye ko ari njyewe uyikoresha."

Yvan Buravan ari ku mugabane w’Uburayi nyuma yuko tariki 14 Gashyantare 2020 yataramiye muri Suède, nyuma y’igitaramo akaba yarakomeje gahunda ze bwite mbere yuko agaruka mu Rwanda.